NAPAKAH JADI HANDAK MANULIS INI..

Imbah kana kupit samalam, asa sasain gair handak kamana-mana. Ulun takutan banar, marganya sudah mambuktiakan saurang mahluknya ada. Gairnya kada napa-napa pang, kalu pina pas awak kada tahan manyandang. Paribasanya Ulun tahan, tapi anak, bini, kuitan, kayapa buhannya. Kalu pina napa-napa, kayapa asa badusanya Ulun. Nang samalam haja Ulun mandam haja, marga Ulun 2 ikung anak Ulun pusitip jua. Alhamdulillaah Bini Ulun kada. Tapi kasian jua inya. Uyuh maharagu kami. Supaya kada mangalihi inya Ulun minta supaya Ulun wan kakanakan diharagu di bangsal haja atau isulasi di rumah sakit. Ahamdulillaah kami nyaman haja manjalaninya.

Gasan nang balum kana, jauhakan bala, jangan dikahandaki lawan kalakuan nang pina mampahawai prutukul kasihatan. Paling kada, masker barang dipakai. 

Imbah waras ni gin hati pagun haja asa galudupan. Mudahan awak wigas tatarusan, jauhakan bala kana pulang, jauhakan bini, anak-anak, kuitan wan barataan kulawarga Ulun matan bala nangini ya Allah. Aamiin..

Rampah Lambin, Dusun Loa Panggang, Desa Loklahung, Kecamatan Loksado

 

KAJADIAN

KAJADIAN

Kajadian!

Kalajuan pang!

Mun marasa diri tinggi

Hudahlah batungak bujur-bujur ka langit

Jangan marasa harat mun sahibar mambanding lawan jaba wara

Jangan marasa di atas

Kalu pina samustawa haja

Kaya kalayangan pas kana anginnya

Imbah cantang pucuk nyiur kada baayun

Kada katikuan banang ka piluntang

 

Kajadian!

Kapiragahan pang!

Langit diludahi, sama lawan mamusut muha lawan banyu liur

 

Di bawah ni balajar ai kayapa batabi lawan nang tuha, sapantaran atawa nang ta anum

Lawan siapa haja

Kada usah lagi bajual papandal

Mun sabatas mahluk paraya disurung

Bapingkut lawan nang ampunya haja

MAMAKAYAI TAPI BAHANU-HANU HAJA

 MAMAKAYAI TAPI BAHANU-HANU HAJA

 

Mamakayai tapi bahanu-hanu haja

Masker pariannya

Imbah ditagur manyantak

Imbah nang managur bajauh manyintak

Nang kaya nang managur virusnya

Urang managur gasan saurang jua

Kada lain kada

 

Mun kaluar pada rumah santak

Mun bakumpulan jaga jarak

Mun bapandiran jangan talalu parak

Paraya baalasan sasak bahinak

Baik bangalih sadikit, biar ha

Daripada kaina mun sudah kana, hingak-hingak

 

Bayangakan nah

Dirumah sakit

Garing, ringak-ringak hidung ba uksigen

Kuitan, bini atawa laki, anak atawa minantu, sapupu, kulawarga

Barataan kadada nang bulih mangawani

Kawani ha, mun handak jua kana!

Kada marantan lah

Bauling ka kanan dinding

Bauling ka kiwa dinding

Di atas kapala dinding

Di hunjuran batis, dinding

Kada muyaklah, dunia sagi ampat

Baatur jam manginum ubat

 

Inya ngaran virus ni mahluknya kada kalihatan pang, jadi ngalihai

Saurang haja lagi manjaga diri

Paling kada jangan tajangkit atawa manjangkiti

 

Sampar niti ujar habar inya hanyar baslumur pulanh, ada pulang nang hanyar

Ada matan india, inggris

Jangan dikira jauh, kita aman haja

Inya ini sudah datang bailang

Ka Indunusia mambawa bala pulang

Jakatra, bugur, kudus, pukuknya banua subarang

Parak kada hingkat maurati

 

Kita pang napa habar

Baingatai, musuh harat, mun kada labar

Du'a, ibadah minta wan ampun-Nya

Ikhtiar tatap jua

BAPIKIR TUHA

BAPIKIR TUHA

 

Kada ragus-ragus

Masak pikir hanyar bakalakuan

Bahitung, bailangan jar urang tu

Pacangan mambawa maslahat kah, mudarat kah gasan saurang atawa gasan urang

 

Mun asal hanggus ti, kada balampu ngarannya

Kada tahu lubak, ranjah barait

Napakah, siapakah, dimanakah, pabilakah, kayapakah

Bapikir tuha kada bataha tasalah

 

Itu tanda

baisi kapala wan kapala baisi

NAK

NAK

Manjanaki muha ikam wayah guring, nak

Napakah..

Asa runtuh hati abah

imbah manyariki ikam sanja tadi

Abah sarik marga sayang, nak ai

 

Wahini ikam balum paham banarai maksudnya Dang'ai

Ikam sangkal hati, marasa disariki

Kaina ada wayahnya

Ikam marasa nang kaya abah

Taungut di hujung tilam, malihat anak guring

Lilih banyu mata, kalir kapipi

Asa manyasal, tapi kada bulih

Inya singhaja supaya anak kada ungah, kada jantik paliran

 

Nak, Ikam harus balajar mahitung langkah

Mangali mana nang bujur mana nang salah

HIRI? UMPATI!

HIRI? UMPATI!

Inya marga napa

Katuju banar maakui andih urang

Paampihannya saraba handak dikaku

Ampunku, ampunku

Ampun urang, ampunku

Piasat

 

Bila urang baisi napakah

Bahiri inya, hiri marga kada iskaya

Bila malihat urang pina bapakulih usaha, rusak pulang hatinya

 

Kabisa ti maramu nang sudah jadi

Kada hakun balajar, batiti nang kaya balajar aksara, matan alif hampai ya

 

Ni lah, umpat mananam kada, mamupuk kada, maka handak bapadah buahnya ampun inya, dimana maandak muha

 

Balajar pang, jangan nang kaya pambalantikan haja

Umpat bahuma, jangan mahiri'i pakulih urang nang ruah-raih hari-hari di pahumaan

 

Hiri, umpati

Jangan takulibi

 

ADAB

 ADAB

Pian hanyar lahir Sanak'ai, Sidin sudah sapuluh kali baganti salumur.

 

Baik banar mun kada maingkuti paribasa "upung mamadahi mayang"

 

Umpama :

Maulah minyak lalaan tu matan santan hulu, ujar katilambung mamadahi nyiur

Han, sadang kalu kalakuan

Siapa nang tuha, siapa nang anum

Nang mana nang hudah rahat malinjangi

Nang mana nang hanyar handak mahayaui

 

Bujur haja ilmu kada baipang di umur

Tapi adab tinggi pintannya

 

Laisal jamalu bi astwaabin tuzayyinuna

Innal jamala jamalal ilmi wal adabi

KANYA HA

KANYA HA

Pinandu haja nang kayapa hantu nang kayapa kuyang

 

Munnya sudah ajal, ditukupi kayapa kah, kaina basilak jua

Kada parigal, basanya nang taliat haja

Kada muntung manyambat, buntutnya nang mahambat

Imbah diliat, ditiring

Maraha urang bakuling, kita tatap takurihing

Kadada paruginya jua ha

Cakada jua pacangan juhing atawa sumbing

Hing ha bakurihing

Kanya haja urang

Asal kita bamintu-mintu

Kayapa aku, kaya urang.

RASNANG

RASNANG

Karas ampun saurang haja

Nang kaya inya haja baisi aturan, jar ku kada bulih, kada tipang, padahal urang tahu saalaman inya piragah banarai

Piragah jadi hayam jagau, tapi kada saungan

Cuba wani manyubarang pahalatan, buktiakan pang

Jangan aturan haja nang wani mangakat ka kampung urang, mangaluar pang

Jangan kaya kungkung dalam tampurung, bunyinya wara hangkui, awanknya kada wani baungkai

JANGAN BAKUKULITAN

 JANGAN BAKUKULITAN

Jangan bukulitan

Kuyak ha, supaya kalihatan isi

Supaya pinandu, mana wariknya nang malinggang ka kapal

 

Inya batatangguhan tu kada baik, batarawah, ayungannya siwah

Jakanya ti lah, jakanya haja pang

Jangan tatarang balambika, kadap tu ngarannya

Kada balampu jar urang banua

Kada bapanarang hati, kada tahu siapa nang dihadapi

Kalu pina diguplahnya balak lawi

Haraw, manyupani diri

BACARAMIN DAHULU

 BACARAMIN DAHULU

Takutan baluas jar lubang hidung

Cah, karamput dangka

 

Lubang hidung tu cakada pacangan luwaw

Imbah bapadah takutan ranai, iyakah?

 

Jangan manyalahakan nang bajagaan, inya batugas, buhannya bujur haja

Mun handak umpat lalu, lalu haja, bapadah handak kamana

Jangan kisah urang haja nang salah, padahal saurang masih di rumah

Kada kamana-mana, tapi jadi banar mawada

 

Baingat-ingat, balilihat

IMBAH DILIHAT, DITIRING

IMBAH DILIHAT, DITIRING

Ampihan sudah kaya itu
Kaina inya asa bujur tarus, parasanya inya haja pambujurnya
padahal luput wara
Han.. inya marga itu tih, imbah dilihat ditiring

Sasadangnya haja maulur piluntang
Jangan tapi dibiarakan alayangannya baigal imbah dapat angin
Bahanu tarik, bahanu disisit, supaya inya ingat masih ada nang maniku banangnya

Jangan dirasa akan mun pina sasain racap dihangkup urang
Kaina dikira urang hakun manyandang, tahan manyandang, kahahakunan manyandang
Gabir jua, supaya urang tahu kita bapahimatan
Kada makan nasi wara, istilahnya!

 

Pernah juga merasakan ga enaknya..

LOGIC FRAME RENJA BIDANG PARIWISATA TA 2021

 

MOTIF ANYAMAN KHAS LOKSADO

 

 

KADA TADUA TALU KALI

Kada tadua kali

Ampah nyaman banyak haja nang mahurung

Mun ampah kasakit maka’am, asing-asingnya mangulicar

Bapadah aur, bapadah awak mariap dingin, kucing baranakan, macam-macam ham

Kaina imbah dilihatnya pina nyaman, dihurungnya pulang.

Kada tadua talu kali

 

Kada tadua kali

Inya mun handak kadaham, bilang kisir-kisir

Muha, muntung, lalakunnya, manis banar

Disuruh tumbang tumbalik, bagulung-gulung gin inya hakun haja

Imbah naik kalayangan, kana anginnya, kada ingat lagi lawan nang manating lawan mamiluntang

Kalumpanan, iya banar banih mambajah ka asak wan tutujah

Kada tadua talu kali