BURHAN

"Aaaaa.. Ampuun.. Jua-jua'am naaah.. ampiih.. Aku kada tahan lagii..". Burhan manggarahuk, hahalulung. Dilabuninya muha lawan tangan, babungkun mahundang di ranjang. Awaknya manggatar, paluhnya jajuruhan nang kaya bigi jagung bakitih, pas banar kaya urang limbui imbah mandi kada sing andukan. Jimus wan dingin ganyam awaknya saikungan. Imbah tu  a'arunuh'am inya nang kaya urang ranyau kana garing panas. Nang kaya itu ti tapatu-patut jua hudah, 'ba duhulunya lagi, inya mahululung tipang nang kaya urang kana pulasit, mun di jiran ada kamatian.

Maras banar, bujuran maras banar. Jakanya wayah itu abahnya pagun haja hidup, tanyaman jua bapikir. Ni manunggal umanya nang kujuk-kujuk bajuuk, baikhtiar. Baubat ka duktur, minta banyu lawan tuan guru, bamandi-mandi, disambur, macam-macam tupang, tuhuk hudah umanya Burhan mancari tatamba kamana-mana.  Kada kawa mandangar ada pananambaan, nyamha rumahnya di unjut banua, pasti didatangi sidin. Tapi nang ngaran baluman sampai janjinya han, kasian banar, balum ada jua nang saurat atawa mawarasi. Burhan tatap ham nang kaya itu.

Kadada nang tahunya, napa marganya Burhan jadi kaya itu ti. Inya mulai ubah imbah kajadian wayah kamatian pakacil Kamsi. Burhan nang hanyar haja bulik imbah lawas madam pada banua, hari itu datang malawat umpat batukang maulah tabala. Tuntung batukang inya bajinguk ka pamandian, imbahtu badadas umpat dudukan di palatar. Kada lawas, matanya manciling malihat ka mija, balajur kuciak-kuciak sambil manunjuk ka mija, "jangan dimakan, jangan dimakan, inya bakas di pamandian.. Aaa.. Kadaa, bajauh, bajauuh.. Ampuun", kada sahapa inya marabau siup.

Tumbur lawatan. Siang tuti banyak banar urang nang batangguh, manyangka buruk lawan aruah pakacil Kamsi. Kalambisikan urang marudau, ada haja nang baucap ruh pakacil Kamsi bapuat jar,  imbah tu sidin umpat duduk mamakan surabi nang ada di mija. Ubui, kada mayu talinganya mun mandangarakan muntung pirut urang nang bapandir macam-macam imbah kajadian tuti. Pukuknya, dimana takumpul, disitu dipandir. Ibarat urang manyatil kaset, lagunya itu-itu haja, tabulang-bulik.

Lawas Burhan nang kada tahu di urang. Inya kuciak-kuciak minta tulung haja, bapadah minta ampun, minta maap, bapadah jara, bapadah handak ampih malihat, maka sambil manggarung tangisnya. Rasa rawan hati mandangar. Tapi pulang lah, kayapa urang handak manulungi, mun nang ampun diri, Burhannya saurang cakada biasa manjawab mun ditakuni napa marganya maka inya papar kaitu ti. Kaputingannya, urang di kampung banyak nang manangguh inya salajur gila.

Adajua nang mamandir, Burhan tuti kasap atawa kawa malihat urang subalah, karna wayah lawas kadada di banua inya banyak bakaji ilmu macam-macam, dimana-mana ada gurunya, mulai nang ka kanan sampai nang ka kiwa. Inya tu dasar panuntut pang urangnya.

Hari itu, baisukan Arba, parak pukul sapuluh saku asanya, acil Masnah, umanya Burhan bakuriak papar sambil manangis, "tuluuung, tuluuung.. Tulungi Burhan..". Mandangar suara acil Masnah kada kaya nang masi, urang higa-mahiga rumah calingukan bajinguk, imbahtu mamparapas garubusan bukah manyasah acil Masnah nang pagun haja kuciak-kuciak bahantak batis di watun. Bubuhan nang sungsung kacungkungan di lasmin Idang gen umpat jua manyasah. Pas sampai dihalaman, buhannya malihat acil Masnah hudah taduduk liut di palatar. Awak sidin manggitir layu, manunjuk ka dalam rumah sambil baucap, "Burhan", imbahtu sidin kada tahu napa-napa lagi, siup.

Gagas buhannya naik karumah, tapi babaya maliat ka dalam kamar nang kadap, balalu masing-masingnya pina unjat-unjatan handak masuk. Buhannya takutan kalu pina acil Masnah minta tulung tuti marga Burhan maamuk. "Aku gair nah, burusiahalah inya bapingkutan ganggaman di dalam kamar, labaram kita, mau haja kada mayu uratnya malawani", ujar Bubus. Bubuhan nang pina pagat wan kaki di kampung gin inda kalimbisitan baundur burit, mamburisit hampadalnya. Kira-kira bahitung jua pang buhannya, kalu pina tasupani han. Jaka kada Pangirak Agur nang tadudi datang mahuluakan masuk, kadada nang waninya tupang bajinguk ka dalam. Tu gin bagamat banar buhannya masuk, calingukan ha mambuntil Pangirak.

Tumatan kamar tadangar suara urang nang kasakitan, lamat-lamatan suaranya mangiyau, "Maa, inya kadada lagi, inya kadada lagi", jar Burhan. Kamarnya kadap, lalungkang bakantup. Babaya masuk Pangirak tagulingsir tajajak lantai nang licin, untung sidin baisi palapasan silat bangkuy, jadi kada sawat tajungkang. Pangirak manyuruh buhannya mambuka lalungkang. Imbah tarang, "Astaghfirullaah..", jar buhannya, takajut banar maliat Burhan limbuy darah sa'awakan, tasandar mahadap lamari, tangan kirinya bakarukut ka buncu lamari, handak badiri tapi kada iskaya lagi maangkat awak. Badarak buhannya handak manulungi, tapi babaya Burhan bauling muha, buhannya tahambur baundur, ada nang takuciak bajikir, ada jua nang basadinan bapicik parut imbahtu manggaluak muak. Muhanya hibak darah, Burhan kadada lagi bamata.

Pangirak Agur baparak, "naa uma napa maka naa.. Nangapa wahana ikam niti Bur?". Burhan manggatar maangkat kapala sambil baucap, "ulun kada tahan lagi maarit". "Astaghfirullah", jar buhannya. Burhan manguit matanya saurang, nang kaya urang mangutil buah timbatu. "Nihinya piduduk nang dikahandakinya", jar Burhan, sambil maulur tangan kanannya manampaiakan sapasang biji matanya. Acil Ipau nang umpat calingukan dimuhara kamar basadinan manggarabau, rabah kada tahan malihat. Mananambahi abut buhannya ada'am.

Baisukan itu jua Burhan dibawa ka rumah sakit. Ujar ibu duktur sapisialis mata, Masniah, mata Burhan sudah kawa dibulikakan lagi. Inya tabarubut rahatan Burhan mancabut matanya tuti. "Akayah asa halus awak, asa marma mambayangakan. Tabarubut.." ujar Nurman, sambil bagidik awaknya nang kaya itik imbah banyalam.

Batatangah bulan saku asanya Burhan tuti hanyar kaluar pada rumah sakit. Mun matanya lawas jua pang hanyar karing, batundaan banar tipang warasnya. Tapi nang maulah urang bingung, Burhan kada pina sadih, malahan inya basukur banar sudah waras. Waras, inya kada lagi kahahantuan mun ada kamatian di kampung.

Buhannya nang tumatan tadi mandangarkan kisah, unggut-unggutan pina hikmat banar. "Kai, matan pamulaan sampai nginih, pian kadada takisah lagi nangapa marganya si Burhan ngituh jadi kahahantuan mun ada urang kamatian. Inya napa Kai?", ujar Didin.

"Cahah, da usah ku ungkai gin. Kaina ngalih, kalu pina ada nang kapuhunan mun mancuba-cuba kaya Burhan. Inya pamali dan kadada paidahnya sahama-hama mun digawi, paraya ah." "Kadanya ah Kai'ai, kami handak tahu banarham", jar Utar pina manggasak. Kai pangisahan mambujurakan duduk sambil mangibah tapih, imbah tu sidin baucap, "kataman tabala tu dibanam, sapuakan ha ka kaning. Malihat tu lawan Camariah, inya tu nang rancak disambat atawa disamaakan urang lawan Sangkala. Awaknya habang saikungan". Sampai disitu sidin tagana, imbah maambil pahinakan basar sidin manyambung,  "inyatu nang umpatan kacipik-kacipik rahatan urang mamandii mayat. Imbahitu banyu pamandian tuti, dipapaiakannya ka surabi. Itu pang pungkalanya kanapa Burhan sampai kahahantuan kaitu", jar Kai mamagat kisah. Buhannya unggut-unggutan, inda paham.

Kai badiri basangga tungkat, imbahtu baucap, "sadang kamasigitan, kada sahapa lagi malidang dawuh magrib". Sidin bajalan maminggir, manyusur biding kartak baampah ka masigit, maninggalakan buhannya nang bacacangangan kaya kabubuak kasiangan.